इच्छा - मरणं…!!!

मरण्यासाठी जगण्याचा अट्टाहास केला खरा
पण म्रुत्युपरिस जगण्याचाच सहवास जास्त मिळाला
जगता जगता मरणासाठी तपं केली अनेकवार
अन हाती अंती जगण्याचाच शाप उरला वारंवार

खरच कंटाळा आलाय या निर्थक जगण्याचा
रोज मन मारून जगताना मरणाचा ध्यास धरण्याचा
मरण मात्र मृगजळापरी हुलकावणीच देतं नुसतं 
जगणं आशेने कल्पनेमागे तरी धावत असतं

मरणाच्या खेळामध्ये जगणंच नेहमी का जिंकतं  ?
नको असलं तरी असलं दान ओटीत का पडतं ?
तेव्हाच का नशिबाने झोळी माझी फाटत नाही ?
अन का जीवनाच्या ठीगाळांमधून जगणं खाली सांडत नाही ?

जगणं-मरणं, हा देव सदा आपल्याहाती राखतो
त्याची मर्जी, त्याला हवं तसाच खेळ चालतो
इथे इच्छा असून जगण्याची काहींना जगता येत नाही
अन मी मरण मागूनसुद्धा माझं जगणं काही सुटत नाही … !!!

- Oms
१५-०३-२०१४
००:१६ मि.